የፕሮግራም አጋሮች

«ህልሜ ፊስቱላን ከኢትዮጵያ ማጥፋት ነው። ይህንን በእኔ የሕይወት ዘመን አላሳካው ይሆናል፣ እናንተ ግን በእናንተ ዘመን ልታሳኩት ትችላላችሁ»

— ዶክተር ካትሪን ሀምሊን

ሀምሊን ፊስቱላ ኢትዮጵያ የፕሮግራም ዘርፎችን የበለጠ ለማሳደግ እና ለማጠናከር ከተለያዩ የፕሮግራም አጋሮች ጋር ይሠራል። የጋራ አጋርነቶች ምርጥ የተግባር ሥራዎችን እና አገልግሎቶችን ለመስጠት የሚያግዙ ሲሆን፣ ይህም ለኢትዮጵያ ሴቶች የተሻለ የጤና ውጤት እንዲገኝ ይረዳል።

ዩኤንኤፍፒኤ (UNFPA) ኢትዮጵያ

---

እ.አ.አ. በ2019 ሀምሊን ፊስቱላ ኢትዮጵያ በፊስቱላ ጉዳት ለሚሰቃዩ ኢትዮጵያውያን ሴቶች የእናቶችን ጤና ለማሻሻል ከUNFPA ኢትዮጵያ ጋር አጋርነት መሥርቷል። እ.አ.አ. ከ2019 እስከ 2022 ባለው ጊዜ ውስጥ «በሀምሊን ፊስቱላ ማዕከላት የፊስቱላ እና የማሕፀን መውጣት ችግሮችን የማከም ተደራሽነትን ማሻሻል» በሚል ርዕስ ፕሮጀክቱን ተግባራዊ አድርገዋል። እ.አ.አ. ከ2023 እስከ 2025 «ከግጭት ጋር ለተያያዙ ጾታዊ ጥቃቶች (CRSV) ምላሽ መስጠት» ወደሚል ትኩረቱን በመለወጥ በትግራይ፣ አማራ፣ ኦሮሚያ፣ አዲስ አበባ፣ ቤኒሻንጉል ጉሙዝ፣ ደቡብ ኢትዮጵያ፣ ሶማሌ እና ሲዳማ ክልሎች እየሰራ ይገኛል።

ይህ አጋርነት ምርመራዎችን፣ ሕክምናዎችን፣ ሪፈራሎችን እና የቅስቀሳ ዐውደ ጥናቶችን ጨምሮ በተለያዩ ተግባራት አማካኝነት ፊስቱላ እና የማሕፀን መውጣት (POP) ሕክምናን ለማሻሻል ያለመ ነው። እነዚህ ጥረቶች ስለ ሥነ-ተዋልዶ ጤና (SRH) እና ስለ ጾታዊ ጥቃት (GBV) ግንዛቤን ፈጥረዋል። ከ1,444 በላይ የፊስቱላ ታካሚዎችን እና 1,776 የማሕፀን መውጣት ችግር ያለባቸውን ሴቶችን በማገልገል፣ ለጤና ባለሙያዎች ሥልጠና በመስጠትን እና የማኅበረሰብ መሪዎችን በውይይት በማሳተፍን ዋና ዋና ስኬቶችን አስመዝግቧል።

እ.አ.አ. በ2023–2025 ምዕራፍ፣ ፕሮጀክቱ ለጥቃት የተጋለጡ ሴቶችን የሕይወት ክኅሎት እና መልሶ የማቋቋም ፕሮግራሞችን ጨምሮ ሥልጠናዎችን እና የድጋፍ አገልግሎቶችን በመስጠት ለሴቶች ጤና እና አቅም ግንባታ ያለውን ቁርጠኝነት ይቀጥላል። በአጠቃላይ አጋርነቱ የሴቶችን የጤና አገልግሎት ተደራሽነት ለማሻሻል እና የግጭት እንዲሁም የጾታዊ ጥቃት በሴቶች ጤና ላይ የሚያደርሱትን ተጽዕኖ ለመፍታት ያለውን ከፍተኛ ቁርጠኝነት ያሳያል።

---

ሀምሊን ፊስቱላ ኢትዮጵያ እና ግሪንላምፕ (GreenLamp)

---

በዶክተር ካትሪን እና ሬጅ ሀምሊን ሥራ የተነሳሳው ግሪንላምፕ «ለሴቶች እና ለማኅበረሰብ ብሩህ ተስፋ» በሚል ራዕይ የተመሠረተ ሲሆን «መማር፣ ማብራት እና መምራት» በሚል ተልዕኮ ሥር ይንቀሳቀሳል። እ.አ.አ. ከ2012 ጀምሮ ሀምሊን ፊስቱላ ኢትዮጵያ በገጠሪቱ ኢትዮጵያ ለሚገኙ ሴቶች በትምህርት እና በወሊድ ጉዳት መከላከያ ላይ በማተኮር የእናቶችን ጤና ለማሻሻል ከግሪንላምፕ ጋር በመተባበር እየሠራ ይገኛል።

መማር

እ.አ.አ. ከ2014 ጀምሮ ግሪንላምፕ ከ51 በላይ ለሚሆኑ የሚድዋይፍ ተማሪዎች በሀምሊን ሚድዋቭስ ኮሌጅ የአራት ዓመት የመጀመሪያ ዲግሪያቸውን እንዲያጠናቅቁ ስፖንሰር አድርጓል። የዶ/ር ካትሪን የወሊድ ጉዳቶችን እና ፊስቱላን የመከላከያ ስትራቴጂ ዋና አካል የሠለጠኑ ሚደዋይፎችን በገጠር አካባቢዎች ማሰማራት ነው። እያንዳንዱ ተመራቂ እንደገና ሊሞላ የሚችል የቀዶ ሕክምና ራስ ላይ የሚታሰር መብራት፣ ስለ ሶላር ተከላ ሥልጠና፣ የተመራቂዎች ትስስር (alumni network) ተደራሽነትን ያገኛል፣ እንዲሁም የሁለት ቀናት የግንኙነት እና የአመራር ክኅሎት ሥልጠና ላይ ይሳተፋሉ። በተጨማሪም እንደ «ማማ በርዝስ» (Mama Birthies) ያሉ ክሊኒካዊ የክኅሎት ማሳያ ሞዴሎች ትምህርታቸውን እና የክኅሎት ዕድገታቸውን ያግዛሉ።

ማብራት

የ «Light 4 Life» ፕሮግራም አስተማማኝ የኤሌክትሪክ ኃይል በማይገኝባቸው ከ340 በላይ ለሚሆኑ የሀምሊን አጋር እና የመንግሥት ጤና ጣቢያዎች ዘላቂ የመብራት እና የኃይል አቅርቦትን በገንዘብ ይረዳል። ከሶላር ኢነርጂ ፋውንዴሽን ጋር በመተባበር፣ ሀምሊን ፊስቱላ ኢትዮጵያ እና ግሪንላምፕ የሀምሊን ተመራቂዎች በሚሠሩባቸው የገጠር የጤና ጣቢያዎች የሶላር ፓነሎችን እና መሣሪያዎችን ይተክላሉ። ይህም ለቀዶ ሕክምና ጥራት ያለው መብራት እና ለድንገተኛ ሪፈራሎች የሞባይል ስልኮችን መሙያ፣ እንዲሁም አስፈላጊ የወሊድ መድኃኒቶችን ማከማቻን ያካትታል። የ «Light 4 Life – Sustainability Program» ክትትል በማድረግ፣ የአካባቢ ጤና ባለሙያዎችን በማሠልጠን እና መደበኛ ጥገና በማድረግ ቀጣይነት ያለው ጥራትን ያረጋግጣል፤ ይህም በአካባቢው ማኅበረሰብ ዘንድ እምነትን በመፍጠር ሴቶች እርዳታ ማግኘት እንዲፈልጉ ያበረታታቸዋል፣ በዚህም አሰቃቂ የወሊድ ጉዳቶችን እና መከላከል የሚቻልን ሞት ይቀንሳል።

መምራት

እ.አ.አ. በ2018 የሀምሊን ሚደዋቭስ ኮሌጅ እና ግሪንላምፕ የሀምሊን ሚድዋቭስ የቀድሞ ተመራቂዎች ማኅበርን (HMAN) መሠረቱ – ይህም ለሀምሊን ሚድዋቭስ ኮሌጅ ተመራቂዎች ከምረቃ በኋላ ሥልጠናን፣ የአመራር ክኅሎትን እንዲሁም ቀጣይነት ያለው የግል እና የሙያ ድጋፍ የሚሰጥ ትስስር ነው።

HMAN ዓላማው በሚድዋይፎች መካከል ቀጣይነት ያለው የሙያ ዕድገትን፣ የአመራር ዐውደ ጥናቶችን እና ምርጥ ተሞክሮዎችን መለዋወጥን ማበረታታት፣ የአዋላጆችን ድምፅ እንዲሰማ ማበረታታትና መደገፍ፣ እንዲሁም በፕሮጀክቶች፣ በመሣሪያዎች እና በክኅሎት ሥልጠናዎች ላይ ከአዋላጆች ግብረ-መልስ ማግኘት ነው። አባላት በኢንተርኔት እና በዓመታዊ ክልላዊ ስብሰባዎች በመገናኘት በትስስሩ ውስጥ ድጋፍ እና ግንኙነትን ያጠናክራሉ። በሚድዋይፎች መካከል ያለውን ግንኙነት እና ድጋፍ ለመምራት እና ለማስተባበር በእያንዳንዱ አካባቢ ያሉ አባላት ክልላዊ ተወካዮችን ይመርጣሉ።

ለሀምሊን ፊስቱላ ኢትዮጵያ፣ የቀድሞ ተመራቂዎች ማኅበር መመሥረት በሀምሊን ሚድዋቭስ ኮሌጅ የሚሰጠውን የትምህርት ጥራት ዘላቂ ለማድረግ ከፍተኛ አስተዋጽኦ አለው። HMAN ለሀምሊን ሚድዋይፎች ቀጣይነት ያለው ድጋፍ እና ሥልጠና በመስጠት ምርጥ ሚድዋይፎች ይበልጥ የተሻሉ ያደርጋቸዋል!

ውሜንስ ሆፕ ኢንተርናሽናል (Women’s Hope International)

---

የሴቶች አቅም ግንባታ ፕሮግራም

በ2021 ሀምሊን ፊስቱላ ኢትዮጵያ ከ Women’s Hope International ጋር በመተባበር በደስታ መንደር – የተሀድሶ እና መልሶ ማቋቋም ማዕከል የገቢ ማስገኛ ድጋፍ ለሚያስፈልጋቸው የቀድሞ ታካሚዎች የሙያ ሥልጠና ፕሮግራም ጀመረ። ይህ የሦስት ወር የመኖሪያ ፕሮግራም ሴቶች ለኢኮኖሚ ነጻነታቸው አስፈላጊ የሆኑ ተግባራዊ የሙያ ክኅሎቶችን እንዲያገኙ ታስቦ የተዘጋጀ ነው።

በ «Women’s Hope International» በሚደገፈው በዚህ ፕሮግራም የምግብ ዝግጅት፣ የግብርና ምርቶች ዝግጅት፣ የአትክልት እና የዶሮ እርባታ፣ የንብ እርባታ እና የሸክላ ሥራዎችን ጨምሮ በተለያዩ ዘርፎች ሥልጠና ይሰጣል። በታካሚዎች መረጃ አያያዝ፣ በተሻሻሉ የሥልጠና መመሪያዎች እና ከሥልጠና ተቋማት ጋር በሚደረግ ትብብር ምክንያት የሙያ ሥልጠናው ጥራት እና ስፋት እየተሻሻለ መጥቷል። ተሳታፊዎች የገቢ ዕድሎቻቸው እና የግል ምርጫዎቻቸው በመጨመሩ ብሩህ የወደፊት ሕይወት እንዲገነቡ አቅም ያገኛሉ።

ከቀድሞ ታካሚዎች የሚገኘው ግብረ-መልስ በጣም አዎንታዊ ነው፤ እንደ ሙሉ ያሉ ብዙዎች ሕይወታቸው ስለመቀየሩ ይናገራሉ። ሙሉ ከዳነች በኋላ ወደ ሥልጠናው በመጋበዟ የተሰማትን ደስታ ስትገልጽ «በብዙ ስቃይ ውስጥ እኖር ነበር… በመንደሬ ትንሽ ቤት ከፍቼ ምግብ እሸጣለሁ ብዬ ተስፋ አደርጋለሁ» ብላለች። ፕሮግራሙ ከተጀመረበት ጊዜ አንስቶ ለብዙ ሴቶች ህልማቸውን እንዲከተሉ የሚያስችል ክኅሎት እና በራስ መተማመን በመስጠት ከፍተኛ ተፅዕኖ አሳርፏል።