የመልሶ ማደራጀት እና መልሶ ማቋቋም ፕሮግራም

«ሁሉም ታካሚዎች ለእኔ ውድ ናቸው። ወደ እኛ የምትመጣ እያንዳንዷ ታካሚ የተሻለ ኑሮ እንድትኖር እና ጤናዋ ተሻሽሎ እንድትመለስ ለመርዳት ያለንን ፍቅር፣ እንክብካቤ እና ዕውቀት ሙሉ በሙሉ ለመስጠት እንሞክራለን።»

ዶ/ር ካትሪን ሃምሊን

ጤናን እና ክብርን በማደስ መልሶ ማቋቋም

---

ባለፉት 65 ዓመታት ሃምሊን ፊስቱላ ኢትዮጵያ ከ82,000 በላይ የሚሆኑ ፊስቱላ ያለባቸውን ኢትዮጵያዊያን ሴቶች ጤናና ክብራቸውን መልሶላቸዋል። ዶ/ር ካትሪን ሃምሊን የፊኛ ቀዳዳን ማከም ብቻ ሳይሆን የሴቷን ሁለንተና በፍቅርና በእንክብካቤ ማከም እጅግ አስፈላጊ እንደሆነ የዘወትር እምነታቸው ነበር።

ለዚህም ሲባል ከፊስቱላ ጉዳት ለማገገም እና ለሴቶች የበለጠ ድጋፍ ለመስጠት በሃምሊን ፊስቱላ ኢትዮጵያ የመልሶ ማቋቋም እና የድጋፍ ፕሮግራም አቋቁሟል፡፡ ይህ ፕሮግራም የሃምሊን የእንክብካቤ ሞዴልን የሚያካትት ሲሆን ሴቶች ነጻነትና ክብር ያለው ሕይወት እንዲኖሩ ያስችላቸዋል።

የሃምሊን የመልሶ ማደራጀት እና ማቋቋም ማዕከል – ደስታ መንደር

---

በ1994 ዓ.ም ዶ/ር ካትሪን ሃምሊን የሃምሊንን የመልሶ ማደራጀት እና ማቋቋም ማዕከል፣ በደስታ መንደር ውስጥ መሥርተዋል። ደስታ መንደር (ጆይ ቪሌጅ) ለረጅም ጊዜ በፊስቱላ ሕመም ምክንያት ጉዳት ደርሶባቸው የተፈወሱ ታካሚዎች በቀጣይ ሕይወታቸው የሥልጠና፣ የሥነ-ልቦና እና የማኅበራዊ ድጋፍ አግኝተው ስኬታማ ሕይወት እንዲኖሩ ለማድረግ የተቋቋመ ማዕከል ነው። በርካታ ቀዶ ጥገናዎች ምክንያት ውስብስብ ችግሮች ያጋጠሟቸው አንዳንድ ተጎጂ ሴቶች የተለየ እንክብካቤ ሊያስፈልጋቸው ይችላል።

የአንድን ሴት የፊስቱላ ጉዳት መጠገን የታሪኳ መጨረሻ አይደለም። ለወራት ወይም ለዓመታት በማኅበራዊ ሕይወቷ ተገልላ በመኖሯ ምክንያት ይህች ሴት እንደገና ወደ ማኅበረሰቡ መግባት አስቸጋሪ ሊሆንባት ይችላል። ከእንደዚህ ዓይነት ሴቶች መካከል በራሳቸው ገቢ ሕይወታቸውን መምራት የሚችሉ ጥቂቶቹ ብቻ ናቸው።

በደስታ መንደር እያንዳንዷ ሴት በአግባቡ የተዘጋጀ የመልሶ ማቋቋም እና ሥልጠና ፕሮግራም ይሰጣታል። ሴቶች የምክር አገልግሎት፣ የማንበብና የመጻፍ ክህሎት እንዲሁም መሠረታዊ የሒሳብ ትምህርትን ከሙያ ክህሎት ሥልጠና ጋር ይሰጣታል።

የሃምሊን ቡድን ሴቶች ወደ ማኅበረሰባቸው ሲመለሱ ዘላቂ የሥራ ዕድል እንዲያገኙ ድጋፍ ይሰጣል። በአንዳንድ አጋጣሚዎች ደግሞ እነዚህ ሴቶች የራሳቸውን ንግድ ለማቋቋም እንዲችሉ የመነሻ ካፒታል ድጋፍ ተመቻችቶላቸው የራሳቸውን ገቢ እንዲያገኙ ይደረጋል።

የሃምሊን የሴቶችን የማብቃት ፕሮግራም

---

ዉሜንስ ሆፕ ኢንተርናሽናል ሴቶችን የመደገፍና የማብቃት ፕሮግራምን አዘጋጅቶ አስጀምሯል። በመጀመሪያ ለሦስት ወራት በሚቆይ ፕሮግራም አማካኝነት የገቢ ድጋፍ ለሚያስፈልጋቸው ሴቶች ወሳኝ የሆኑ የሙያ ክህሎቶችን የሚያዳብሩ ሥልጠናዎች ተሰጥቷቸዋል። በአሁኑ ጊዜ ይኸው ፕሮግራም ሁለት ወር የሚወስድ ሥልጠና ተደርጎ የተዘጋጀ ሲሆን በሃምሊን ፊስቱላ ኢትዮጵያ እና በአጋሮቹ አማካኝነት ድጋፍ ይሠራል፡፡ ይህ አዲስ ተነሳሽነት ሴቶች በምርጫቸው እና የግል ነጻነታቸውን አስጠብቀው እንዲኖሩ ያስችላቸዋል። በተጨማሪም ደግሞ ማኅበረሰባቸውን እና በዙሪያቸው ያሉትን ሰዎች ያበረታታል። ፕሮግራሙ አነስተኛ የንግድ ሥራን ጨምሮ የተለያዩ የሥራ ዕድሎችን ያቀርባል።

ትዕግስት የሃምሊን መልሶ ማደራጀት እና ማቋቋም ሥራ አስኪያጅ ስትሆን በደስታ መንደር እየተካሄደ ያለውን ሥራ ሴቶችን የማብቃት ፕሮግራምን በተሟላ መልኩ እንደሚያከናውን ታምናለች።

«ይህ ተጨማሪ የሙያ ሥልጠና በወሊድ ወቅት ጉዳት ለደረሰባቸው ሴቶች የተሟላ የፈውስ ሂደትን ይፈጥራል። እንዲሁም ሕይወታቸውን በልበ ሙሉነት እንዲመሩ እና እንዲገነቡ ያስችላቸዋል።»

የቀድሞ ሕሙማን የሰጡት አስተያየት እጅግ በጣም አዎንታዊ ነበር፤ እንዲሁም ፕሮግራሙ እንደ ሙሉ ላሉ በርካታ ሴቶች ወሳኝ የሆነ የሕይወት ለውጥ አምጥቷል።

ከነዚህ ሴቶች መካከል አንደኛዋ ስትናገር «ብዙ ስቃይ ውስጥ ነበርን። ነገር ግን ከተፈወስን በኋላ እንደገና ለዚህ ሥልጠና ስንጋበዝ በጣም ደስተኛ ነበርኩኝ። ይህንን ደስታዬን የምገልጽበት ቃላት የለኝም። በመንደሬ ውስጥ ትንሽ ቤት ከፍቼ ምግብ ለመሸጥ ተስፋ አደርጋለሁ» ብላለች።

የመልሶ ማቋቋም እና የመልሶ ማዋሃድ ፕሮግራም

---

በሃምሊን ፊስቱላ ኢትዮጵያ፣ የመልሶ ማቋቋም እና የመልሶ ማዋሃድ (R&R) ፕሮግራም ከፊስቱላ ጉዳት ለሚያገግሙ ሴቶች ወሳኝ የሆነ ቀጣይነት ያለው እንክብካቤ የማግኘት ዕድል የሚሰጣቸው ሲሆን ይህም ሂደት ከቀዶ ሕክምና በኋላ የታካሚዎችን ጤና፣ ክብር እና ነጻነትን በመመለስ ረገድ ወሳኝ የሆነ አስተዋጽኦ ያደርጋል። የተቋማችን ሁሉን አቀፍ ሞዴል ከሕመሙ ያገገሙ ሴቶች በቀጣይ የሚያጋጥሟቸውን አካላዊ፣ ሥነ ልቦናዊ፣ ማኅበራዊ እና ኢኮኖሚያዊ ተግዳሮቶች በመተንተን ሴቶቹ ትርጉም ያለው ሕይወትን እንዲኖሩ እና በራስ መተማመን የሞላው ኑሮ እንዲገነቡ ይረዳቸዋል። ፊስቱላ አስከፊ የወሊድ ጉዳት ሲሆን ብዙውን ጊዜ እንደ ርኩሰት ወይም መሃንነት ባሉ የተሳሳቱ አመለካከቶች ዓይን እየታየ የከፋ ማኅበራዊ መገለልን ያስከትላል። ብዙ ሴቶች በዚህ ሕመም ምክንያት ለአካላዊ ሕመም እና ለሥነልቦናዊ ጉዳት ይጋለጣሉ። በርካታ ሴቶች በዚህ ሕመም ሳቢያ ጥልቅ ወደሆነ የኃፍረት እና የመገለል አዘቅት ይገፋሉ። በሃምሊን ሆስፒታሎች የታከሙ ሁሉም ታካሚዎች ከጉዳታቸው ጋር የተያያዘ የሥነልቦና ጭንቀት ችግር እንደሚደርስባቸው ሪፖርት አድርገዋል። የሃምሊን የእንክብካቤ ሞዴል በዓለም አቀፍ ደረጃ በሩህሩህ እና ሙሉ ክህሎት ባላቸው ባለሙያዎች የሚተገበር ዕውቅ ሞዴል ነው። 

በዚህ ሞዴል በ2016-17 የበጀት ዓመት 2,156 ሴቶች የመሠረታዊ ሒሳብ እና የማንበብ እና የመጻፍ ትምህርት አግኝተው ይህንን ሞጁል በስኬት አጠናቀዋል። ይህም ሂደት አስፈላጊ የሕይወት ክህሎቶችን አስታጥቋቸዋል። በተጨማሪም የሥነልቦና ምክር እና የማኅበረሰብ ተሳትፎ እንቅስቃሴዎች በመቶዎች የሚቆጠሩ ተጨማሪዎችን ተጠቃሚ ያደረጉ ሲሆን 1,185 ሴቶች የሥነልቦና እና የመንፈሳዊ ደኅንነት መሻሻል ሪፖርት አድርገዋል፣ 1,147 የማኅበራዊ ግንኙነቶችን አሻሽለዋል። ይህም ሪፖርት በአጠቃላይ የማገገም ሁኔታው ወሳኝ የሆኑ አወንታዊ ምልክቶችን እንዳሳየ ያመለክታል። ኢኮኖሚያዊ ማንሰራራት እና ስኬታማነት የመልሶ ውህደት ሂደቱ እምብርት ጉዳዮች ናቸው። በዚህ ዓመት፣ 386 ሴቶች በግል የንግድ ዕቅዶች ነድፈው እና በጅምር ካፒታል ተደግፈው ዳግም ወደ ማኅበረሰባቸው እንዲቀላቀሉ ተደርገዋል።