የሥልጠና አጋሮች

«ሀምሊን ሁለንተናዊ እና ታካሚን ማዕከል ባደረገ እንክብካቤው ምርጥ ማዕከል ነው። የበለጠ ማደግ ለሚፈልግ ማንኛውም ሰው ትኩረት የሚስብ፣ በሚገባ የተዋቀረ እና ሁልጊዜም እያደገ ያለ ተቋም ነው።»

— ዶክተር ቢኒያም ሲራክ፣ የሀምሊን ይርጋለም ፊስቱላ ሆስፒታል የሕክምና ዳይሬክተር እና ቀዶ ሕክምና ሐኪም

ሀምሊን ፊስቱላ ኢትዮጵያ በሁሉም የሀምሊን ሆስፒታሎች ውስጥ ምርጥ የሕክምና አገልግሎት መሰጠቱን ለማረጋገጥ እንዲሁም ይህ ልምድ ከኢትዮጵያ ድንበር ባሻገር እንዲጋራ ከሥልጠና አጋሮች ጋር ይሠራል። የሀምሊን ክሊኒካዊ ቡድን በሙያቸው እንዲያድጉ እና ልዩ ክኅሎቶቻቸውን እንዲያዳብሩ የሥልጠና ዕድሎች ይመቻቹላቸዋል። ዶክተር ሬግ እና ዶክተር ካትሪን ሀምሊን የማይናወጥና ከፍተኛ ጥራት ያለው የሥራ ባህል አስርፀዋል – ይህም ዛሬም ለሀምሊን ፊስቱላ ኢትዮጵያ ማዕከላዊ እሴት ሆኖ ቀጥሏል።

ዓለም አቀፍ የፅንስ እና ማሕፀን ሕክምና ፌዴሬሽን (FIGO)

---

የፊስቱላ ቀዶ ሕክምና ሥልጠና ኢኒሼቲቭ

ሀምሊን ፊስቱላ ኢትዮጵያ በወሊድ ፊስቱላ ሕክምና ረገድ እንደ ዓለም አቀፍ የምርጥ ማዕከል በመሆን ከመላው ዓለም የመጡ ቀዶ ሕክምና ሐኪሞችን የማሠልጠን ረጅም እና ታሪካዊ ልምድ አለው።

የአዲስ አበባ ሀምሊን ፊስቱላ ሆስፒታል እ.አ.አ. በ1974 ለመጀመሪያ ጊዜ ሲከፈት፣ ቀዶ ሕክምና ሐኪሞች ፊስቱላ ላለባቸው ሴቶች የቀዶ ሕክምና ዘዴን እና ሁለንተናዊ ሕክምናን ቀዳሚ ከሆኑት ከዶክተር ሬግ እና ዶክተር ካትሪን ሀምሊን ለመማር ሆስፒታሉን ይጎበኙ ነበር። ይህ ልምድ በዐሥርት ዓመታት ውስጥ የዳበረ ሲሆን፣ የሀምሊን ፊስቱላ ቀዶ ሕክምና ሐኪሞችም በፊስቱላ ጠጋኝ ቀዶ ሕክምና ዘዴዎች ላይ ሥልጠና ለመስጠት ወደ ውጭ አገራትና ወደ ሌሎች የሕክምና ተቋማት መጓዝ ጀምረዋል።

እ.አ.አ. በ2014 ሀምሊን ፊስቱላ ኢትዮጵያ ከዓለም አቀፍ የፅንስ እና ማሕፀን ሕክምና ፌዴሬሽን (FIGO) ጋር «በFIGO የፊስቱላ ቀዶ ሕክምና ሥልጠና ኢኒሼቲቭ» ላይ በጋራ መሥራት ጀመረ። ይህ ኢኒሼቲቭ ቀደም ብለው ከተቋቋሙ የፊስቱላ ሕክምና ተቋማት (የFIGO ሥልጠና ማዕከላት) ጋር በቅርበት በመተባበር፣ ፊስቱላ አሁንም ዋና የማኅበረሰብ ጤና ችግር ሆኖ በሚቀጥልባቸው ዝቅተኛ ገቢ ያላቸው እና ግብዓት በሌላቸው የዓለም አገራት ውስጥ ክኅሎት ያላቸው የፊስቱላ ቀዶ ሕክምና ሐኪሞችን ቁጥር ለመጨመር ያለመ ነው።

የFIGO ሥልጠና ማዕከል ከሆነበት ጊዜ ጀምሮ ሀምሊን ፊስቱላ ኢትዮጵያ የቀዶ ሕክምና ሠልጣኞችን (FIGO Fellows) እና የባለብዙ ዘርፍ ቡድኖችን ሥልጠና ደግፏል። በፕሮግራሙ ውስጥ ለመሳተፍ ፍላጎት ያላቸው አመልካቾች በFIGO በኩል የሚያመለክቱ ቢሆንም፣ ማን ተቀባይነት እንደሚያገኝ የሚወሰነው ከሀምሊን ፊስቱላ ኢትዮጵያ የሕክምና ዳይሬክተር እና የFIGO አሠልጣኝ ከሆኑት ከዶክተር ቢኒያም ሲራክ ጋር በጋራ ነው።

ሠልጣኞች አንዴ ፕሮግራሙን ሲቀላቀሉ፣ የፊስቱላ ቀዶ ሕክምና ክኅሎቶችን እና የሀምሊን የእንክብካቤ ሞዴል (Hamlin Model of Care) ዕውቀትን እንዲያገኙ በሀምሊን ፊስቱላ ኢትዮጵያ ሥልጠና ይሰጣቸዋል። የFIGO ሠልጣኞች የመጀመሪያው የሥልጠና ምደባ ለስድስት ሳምንታት የሚቆይ ሲሆን፣ ሥልጠናው አብዛኛውን ጊዜ በሁለት ሳምንት በአዲስ አበባ ሀምሊን ፊስቱላ ሆስፒታል እና በአራት ሳምንት በአንዱ የሀምሊን ክልላዊ ሆስፒታሎች ውስጥ ተከፋፍሎ ይሰጣል።

ባለፉት ዓመታት ከባንግላዲሽ፣ ከቤኒን፣ ከቡሩንዲ እና ከኮንጎ ዲሞክራቲክ ሪፐብሊክ የመጡ አምስት ቀዶ ሕክምና ሐኪሞች በአዲስ አበባ ሀምሊን ፊስቱላ ሆስፒታል ሥልጠና ወስደው ምርጥ የፊስቱላ ቀዶ ሕክምና ዘዴዎችን ተምረዋል። በሚቀጥሉት ዓመታትም ተጨማሪ የFIGO ሠልጣኞች ሥልጠና እንዲወስዱ ቀጠሮ ተይዟል። እስካሁን ድረስ በመላው አፍሪካ እና እስያ ከሚገኙ 19 አገራት የተውጣጡ ከ30 በላይ ቀዶ ሕክምና ሐኪሞች እንዲሁም ከመላው ዓለም የተውጣጡ ነርሶችን እና ፊዚዮቴራፒስቶችን ጨምሮ 27 ተዛማጅ የጤና ባለሙያዎች የFIGO ሥልጠናን ወስደዋል። እነዚህ ቀዶ ሕክምና ሐኪሞች እና የጤና ባለሙያዎች በአሁኑ ጊዜ ክኅሎታቸውን በመጠቀም እንደ ማዳጋስካር፣ ጋና፣ ኮንጎ ዲሞክራቲክ ሪፐብሊክ እና በሌሎች የአፍሪካ፣ እስያ እና የመካከለኛው ምሥራቅ አገራት የሚገኙ ሴቶችን በመርዳት ላይ ናቸው።

እ.አ.አ. በመስከረም 2022 በአንድሪው ብራውኒንግ የሚመራው እና ቀደም ሲል የቀድሞውን የሀምሊን ፊስቱላ ኢትዮጵያ የሕክምና ዳይሬክተር ዶክተር የሺነህ ደመረውን ያካተተው የFIGO ባለሙያ አማካሪ ቡድን፣ ለፊስቱላ ቀዶ ሕክምና ሐኪሞች የሚሆን አዲስ የሥልጠና መመሪያ አሳትሟል። የFIGO የፊስቱላ ቀዶ ሕክምና ሥልጠና መመሪያ (The FIGO Fistula Surgery Training Manual) አዳዲስ ይዘቶችን፣ ለምሳሌ የቅርብ ጊዜ የቀዶ ሕክምና ዘዴዎችን፣ አዳዲስ የቀዶ ሕክምና ሥዕላዊ መግለጫዎችን እና የግድግዳ ቻርቶችን ይዟል። ይህ መመሪያ ለፊስቱላ ቀዶ ሕክምና ሥልጠና ኢኒሼቲቭ እንዲሁም ለዓለም አቀፉ የፊስቱላ ማኅበረሰብ ግንባር ቀደም የትምህርት መርጃ መሣሪያ ነው።

የፊስቱላ አስከፊ ተፅዕኖ በኢትዮጵያ ብቻ የተገደበ አይደለም፤ ለዚህም ነው ፊስቱላን የማጥፋት ትግል ዓለም አቀፋዊ ትግል የሆነው። ሀምሊን ፊስቱላ ኢትዮጵያ ከኢትዮጵያ ድንበር ባሻገር ካሉ ቀዶ ሕክምና ሐኪሞች ጋር በመሥራቱ ይኮራል፤ በመተባበር እንዲሁም ዕውቀትና ክኅሎትን በማጋራት ይህንን ሊከላከል የሚችል የወሊድ ጉዳት ለአንዴና ለመጨረሻ ጊዜ ማጥፋት ወደሚለው ግባችን እንቃረባለን።

ከመቀሌ ዩኒቨርሲቲ እና ከዎርልድ ዋይድ ፊስቱላ ፈንድ (Worldwide Fistula Fund) ጋር

---

የዩሮ-ጋይኔኮሎጂ ፌሎውሺፕ ፕሮግራም

የዩሮ-ጋይኔኮሎጂ ፌሎውሺፕ ፕሮግራም በ2015 የተጀመረው ቀዶ ሕክምና ሐኪሞች ውስብስብ የሆኑ የዩሮ-ጋይኔኮሎጂ ሁኔታዎችን ለማከም፣ የሽንት መቆጣጠር ችግርን ለመጠገን፣ ደኅንነቱ የተጠበቀ የሽንት ማስተላለፊያ ዘዴን ለመፍጠር፣ የኩላሊት ሥራን ለመጠበቅ እና በመጨረሻም የሕይወትን ጥራት ለማሻሻል የሚያስችሉ የላቁ ክኅሎቶችን እንዲያገኙ ለማድረግ ነው።

ይህ ፕሮግራም በሀምሊን ፊስቱላ ኢትዮጵያ ከመቀሌ ዩኒቨርሲቲ እና ከ «Worldwide Fistula Fund» ጋር በመተባበር የሚመራ ነው። ፕሮግራሙ በዩሮ-ጋይኔኮሎጂ፣ በሴቶች የዳሌ ሕክምና እና በመልሶ ግንባታ ቀዶ ሕክምና ላይ ያተኮረ የሦስት ዓመት ልዩ ትምህርትን ያካትታል። ፕሮግራሙ በመቀሌ ዩኒቨርሲቲ ዕውቅና የተሰጠው ሲሆን፣ የገንዘብ ድጋፉ የሚቀርበው በ«Worldwide Fistula Fund» ነው።

ይህ የፌሎውሺፕ ፕሮግራም በበጎ አድራጎት ድርጅት፣ በክሊኒካዊ አገልግሎት ሰጪ ድርጅት እና በመንግሥት በሚደገፍ የሕክምና ማስተማሪያ ተቋም መካከል ትብብርን ለመፍጠር በሚያስችል መልኩ የተነደፈ ሲሆን፣ በጋራ ግብዓቶች እና ሙያዊ ልምዶች አማካኝነት ሥልጠናን እና ዕውቀትን ያሳድጋል።

ሥርዓተ-ትምህርቱ ግልጽ የመግቢያ መስፈርቶች እና የጥናት ማጠናቀቂያ ቅድመ-ሁኔታዎች አሉት። ትምህርቱ በክፍለ-ትምህርቶች (ሞጁልስ) የተከፋፈለ ሲሆን፣ እያንዳንዱ ክፍል ሦስት የብቃት ደረጃዎችን ይዟል። ሠልጣኞች ሁሉንም ሦስት ደረጃዎች ማጠናቀቅ እና በእያንዳንዱ ክፍል ውስጥ በባለሙያ አካዳሚክ ሠራተኞች የሚገመገሙ በችግር አፈታት ላይ የተመሠረቱ ግምገማዎችን ማለፍ አለባቸው።

የሥልጠና ክፍለ-ጊዜዎች አብዛኛውን ጊዜ በሀምሊን ፊስቱላ ኢትዮጵያ የክልል ፊስቱላ ሆስፒታሎች እና በመቀሌ ዩኒቨርሲቲ አይደር አጠቃላይ ስፔሻላይዝድ ሆስፒታል ውስጥ ይሰጣሉ። ይህ አካሄድ በመላው አገሪቱ ልዩ ሕክምና እንዲሰጥ የሚያመቻች ሲሆን የዕውቀት እና የክኅሎት ሽግግርን ያበረታታል።

እስካሁን ድረስ ሰባት ሠልጣኞች ከፕሮግራሙ የተመረቁ ሲሆን፣ አምስቱ በአሁኑ ጊዜ በሀምሊን ፊስቱላ ኢትዮጵያ በማገልገል ላይ ይገኛሉ። ሁለት ሠልጣኞች አሁንም በትምህርታቸው ላይ ናቸው፤ አዳዲስ ሠልጣኞችም በቅርቡ ፕሮግራሙን ይቀላቀላሉ። ሀምሊን ፊስቱላ ኢትዮጵያ በመላው ኢትዮጵያ የዩሮ-ጋይኔኮሎጂ ፌሎውሺፖችን በማልማት እና በማሠልጠን ረገድ ግንባር ቀደም ሚና እየተጫወተ ይገኛል።