የሕክምና ፕሮግራም

«ለፊስቱላ ቀዶ ሕክምና ባለሙያ ትልቁ ደስታ በድህነት፣ በሐዘን እና ትካዜ ውስጥ ያለች ታማሚ ሴት በድንገት አዲስ ሰው ሆና በደስታና እና በጤንነት ስትወጣ ማየት ነው።»

ዶ/ር ካትሪን ሃምሊን

ጤናን እና ክብርን በሕክምና መመለስ

---

ሃምሊንፊስቱላኢትዮጵያ በወሊድ ወቅት በሚከሰት እና የሕክምና ሂደት መከላከል ይቻል የነበረን ጉዳት  የደረሰባቸውን ሴቶች ጤና እና ክብር ለማረጋገጥ በመሥራት ላይ ይገኛል። አብዛኛዎቹም የፊስቱላ ቀዶ ሕክምናዎች በአጠቃላይ እስከ ሁለት ሰዓት በሚፈጅ ሕክምና በአንድ ጊዜ ሊጠገኑ የሚችሉ ናቸው።

ሃምሊን ፊስቱላ ኢትዮጵያ በዓለም አቀፍ ደረጃ በፊስቱላ ሕክምና ቴክኒካዊ ልህቀት የሚታወቅ ተቋም ነው። ይህ ፈር ቀዳጅ የሆነ የቀዶ ሕክምና ማዕከል በዶ/ር ሬጅ እና በዶ/ር ካትሪን ሃምሊን የተቋቋመ ሲሆን እንደ የአውስትራሊያ የሕክምና ማኅበር፣ የአሜሪካ የፅንስና የማሕፀን ሐኪሞች ኮሌጅ፣ የዓለም ጤና ምክር ቤት፣ የኤድንበርግ ሮያል የቀዶ ሕክምና ኮሌጅ እና የማሕፀን ቀዶ ሕክምና ባለሙያዎች ማኅበር ባሉ ግንባር ቀደምት የሆኑ ድርጅቶች በዓለም አቀፍ ጤና አጠባበቅ ረገድ ባለምርጥ ተሞክሮ ተደርጎ ዕውቅና አግኝቷል።

እስካሁን ድረስ ቁጥራቸው ከ82,000 በላይ የሚሆኑ ኢትዮጵያውያን ሴቶች በሃምሊን አማካኝነት ጤንነታቸውና ክብራቸው ተመልሶላቸዋል።

የሃምሊን የፊስቱላ ሆስፒታሎች

---

በመጀመሪያ በአዲስ አበባ  ልዕልት ፀሐይ መታሰቢያ ሆስፒታል ሲሠሩ የነበሩት ዶ/ር  ሬጅ እና ካትሪን ሃምሊን  የፊስቱላ ጉዳቶችን ለማስተካከል የቀዶ ሕክምና ዘዴውን አሻሽለው የተለያዩ የወሊድ ጉዳዮችን ማከማቸውን ቀጠሉ፡፡  በመጀመሪያዎቹ ሦስት ዓመታት ውስጥ  ሬጅ እና ካትሪን ለ300 የፊስቱላ ታካሚዎች የቀዶ ሕክምና ሕክምና አድርገዋል። 

የፊስቱላ ፈውስ ዜና እየተስፋፋ ሲሄድ በርካታ ተጨማሪ ታካሚዎች ሕክምና ለማግኘት መጉረፍ ጀመሩ። በዚህ ምክንያት ካትሪን እና  ሬጅ ይህንን ከፍተኛ የሕክምና ፍላጎት ለማሟላት የገንዘብ ማሰባሰብ እንቅስቃሴ ማድረግ ጀመሩ፡፡ በዚህ ሂደት በ1966 ዓ.ም. ሃምሊን ፊስቱላ ኢትዮጵያን በዓለም ታዋቂ የሆነውን የአዲስ አበባ ፊስቱላ ሆስፒታልን ከፈቱ።

ከሃምሊን አዲስ አበባ የፊስቱላ ሆስፒታል በተጨማሪም ካትሪን በሩቅ አካባቢዎች ሴቶች የጤና አገልግሎቱን ተጠቃሚ እንዲሆኑ ለማረጋገጥ በመላው ኢትዮጵያ አምስት የክልል የፊስቱላ ሆስፒታሎችን አቋቁመዋል። ስድስቱም የሃምሊን የፊስቱላ ሆስፒታሎች የቀድሞ ታካሚዎች ያለክፍያ ወደ ሕክምና የሚመለሱበት እና የወሊድ አገልግሎት የሚያገኙበትን ዕድል ይሰጣል። ለዚህ ሁሉ ተግባር ለጋሾች ከፍተኛ የሆነ ምስጋና ይገባቸዋል።

የሃምሊን የታካሚዎች አፈላልጎ የማግኘት ፕሮግራም

---

በአሁኑ ጊዜ በኢትዮጵያ ውስጥ 22,000 ሴቶች በወሊድ ወቅት በሚከሰት የፊስቱላ ጉዳት እንደተጠቁ ይገመታል። ከእነዚህ ሴቶች መካከል አብዛኛዎቹ በአካልም ሆነ በሥነ ልቦና ከማኅበረሰቡ ተገልለው፣ ተደብቀው እና ለብቻቸው እንዲሰቃዩ የተፈረደባቸው ናቸው።

የሃምሊን የታካሚዎች አፈላልጎ የማግኘት ፕሮግራም እነዚህን ሴቶች ከያሉበት የኢትዮጵያ ጥግ የማግኘት እና የመሰብሰብ ተግባር ላይ ያተኩራል። ቁርጠኛ የሆኑ የጤና መኮንኖች እነዚህን ሴቶች ቤት ለቤት እና መንደር ለመንደር በመዞር ያገኙዋቸዋል። ከዚያም በሃምሊን ክልላዊ የፊስቱላ ሆስፒታሎች ሕይወታቸውን የሚቀይር ሕክምና እንዲያገኙ ያደርጓቸዋል። በተጓዳኝም በዘመቻ መልክ ማኅበረሰቡን ስለ ፊስቱላ ሕመም በማስተማር የበሽታ መከላከል ተግባር ያከናውናሉ፡፡

በ2011 ዓ.ም. ሃምሊን ፊስቱላ ኢትዮጵያ ከ UNFPA (ዩኤንኤፍፒኤ) ኢትዮጵያ ጋር የፊስቱላ ጉዳትን ወይም የማሕፀን መውጣት ችግር ያጋጠማቸውን ሴቶች በመለየት እና ለማከም የሚደረገውን ጥረት አጣምሮ ለመጓዝ አጋርነት ፈጥሯል።

የሃምሊን ክሊኒካዊ ቡድን

---

በአሁኑ ግዜ የሃምሊን ፊስቱላ ኢትዮጵያ ቡድናችን ከ600 በላይ ሰዎችን ያቀፈ ሲሆን በዶ/ር ካትሪን ሃምሊንን የእናቶች ጤና አጠባበቅ ለሴቶች ጤናማ ሕይወት መሻሻል ራዕይ ከግብ ለማድረስ ጠንክሮ በመሥራት ላይ ይገኛል።

ሃምሊን በዓለም ዙሪያ ፊስቱላን ለማጥፋት በሚደረገው ትግል ውስጥ ቁልፍ የሆነ ድርጅት ምልክት እና መሪ ሲሆን ሴቶች ሰብአዊነታቸውን ደግመው እንዲያረጋግጡ፣ ጤናቸውን እና ደኅንነታቸውን እንዲጠብቁ እና በቤተሰቦቻቸው እና በማኅበረሰብ ውስጥ ያላቸውን ሚና እንዲመልሱ የሚያስችል ሁሉን አቀፍ ሕክምና እና እንክብካቤን ለማምጣት ሰፊ መንገድን የከፈተ ተቋም ነው።

የሃምሊን ፌስቱላ ክሊኒካዊ ቡድን አንዳንድ አባላትን ለማግኘት ከፈለጉ እዚህ ላይ ጠቅ ያድርጉ።

የሕክምና ሥልጠና አጋርነቶች

---

በዓለም ዙሪያ የሚገኙ ዕውቅ የቀዶ ሕክምና ሐኪሞች ይህንን ታዋቂ የሆነ እና በዓለም ዙሪያ ምርጡ ሕክምና ለማየት ወደ ሃምሊን ሆስፒታሎች በተደጋጋሚ ይመጣሉ።

ከ2007 ዓ.ም. ጀምሮ ሃምሊን ፊስቱላ ኢትዮጵያ ከመቀሌ ዩኒቨርሲቲ ጋር በመተባበር የዩሮጋይኒኮሎጂ ፌሎውሺፕ ፕሮግራምን አቋቁሟል። ይህ ፕሮግራም የቀዶ ሕክምና ሐኪሞች ውስብስብ የሆኑ የዩሮጋይኒኮሎጂ ሁኔታዎችን ለማከም የላቀ እና ልዩ የሆነ ክህሎትን ይሰጣቸዋል።